JIMBO ANALOGOMBEA SAIDA KAROLI NI LIPI?

Mfumo wetu wa Bunge tulionao sasa hivi unaruhusu kila mtu kuingia bungeni kufuata anachokitaka yeye, badala ya wanachokitaka wananchi.

Mimi pamoja na watu wengine wanaofuatilia mambo ya siasa hapa Tanzania, tumekuwa tukisubiri kwa hamu kujua jimbo la uchaguzi atakalogombea Saida Karoli.

Hata kama siyo jimbo labda udiwani au ubunge wa viti maalumu kupitia chama chochote cha siasa. Umaarufu aliojijengea Saida Karoli, kwa siku za hivi karibuni unamtosha kabisa kuwa mwakilishi wa Watanzania ndani ya Bunge au kwenye vikao vya halmashauri ya wilaya na miji............

Saida ana sauti nzuri inayopendwa na watu wengi hapa Tanzania, Afrika ya Mashariki na kwingineko duniani. Umaarufu wake, kipato chake na kampuni yake, vinamtosha kuwa mgombea na kupita!

Wabaya wake wanasema amefulia, lakini bado yuko na anaendelea na shughuli zake.

Haiwezi kutushangaza kumsikia akijitangaza kugombea ubunge. Siyo kwamba watu wanawataka wabunge na kuwaomba kugombea, bali wao wana nia ya kugombea!

Katika hali ya kawaida, mtu huwezi kuomba kuwatumikia watu, bali watu wanaweza kukuomba kuwatumikia! Ubunge au udiwani ni uwakilishi, ni kuwasemea wengine; ni kutumwa na wengine. Ni kibarua kigumu maana mtu anakuwa na wajibu wa kusema yale aliyotumwa na wengine.

Ni kazi ngumu ambayo mtu anayeamua kuiomba anakuwa na roho ngumu; vinginevyo ni kazi ambayo watu wenye uwezo (kisomo na upevu wa fikra) katika jamii wanaombwa kujitolea kutumwa!

Siku za nyuma ili kuwa mwakilishi ilikuwa ni lazima mtu atimize sifa. Ilikuwa ni lazima mtu awe mwanasiasa na mzalendo wa kweli. Vilijengwa vyuo vya siasa na maadili! Pia kulikuwa na miiko. Siyo kila mtu angeweza kujibatiza mwanasiasa na kutaka kuwa mwakilishi.

Leo hii ni ‘utandawazi na siasa huria.’ Tumefunikwa na jinamizi na kujidanganya kwamba kila mtu anaweza kuwa mwanasiasa! Na wengine wanakwenda mbali na kujiaminisha kwamba kila mtu anaweza kuwa daktari au profesa. Tuna madaktari na maprofesa wengi, lakini vitabu vichache! Hawa madaktari na maprofesa tunaowasikia mitaani, waliandika nini na kutafiti nini inabaki kuwa kitendawili na ndoto za mchana!

Inashangaza kwamba uchaguzi wa mwaka 2010; Jina la Saida Karoli, halikujitokeza. Inashangaza kidogo maana wasanii wenzake ambao anawapita kwa mbali majina yalijitokeza. Labda ni kwa vile hajazunguka na kutumbuiza kwenye kampeni za CCM? Akipata maarifa ya kufanya hivyo mwaka huu, ni lazima jina lake litajitokeza!

Wagombea wengi waliojitokeza kwenye uchaguzi wa mwaka 2010 na hasa wale wa kupitia chama tawala, walitufumbua macho kwamba siasa hapa Tanzania ni uwanja wa kila mtu. Hakuna sifa, elimu, karama na uwezo wa kuchambua mambo mbalimbali katika jamii na dunia nzima kwa jumla na wala siyo lazima mtu awe mwanasiasa! Sifa kuu ni umaarufu na fedha.

Na Mwanaharakati.