MKAKATI WA UMEME KANDA YA ZIWA WAWAHITAJI MAMENEJA KUTOA MAELEZO KUPITIA VYOMBO VYA HABARI

MAMENEJA wa Tanesco kanda yaziwa wametakiwa kutoa taarifa za mgao wa umeme kwa wateja kupitia vyombo vya habari hasa Radio za kijamii ili kuchukua tahadhari ya kuharibikiwa  mali zao majumbani au taasisi husika.

Naibu waziri wa Nishati na madini Bw Charles Mwijage amesema hayo wilayani Biharamulo wakati wa ziara yake ya kukagua mitambo ya kufua umeme wilayani humo akiwa katika ziara ya kikazi  katika mikoa ya kanda ya ziwa.

Bw Mwijage amesema kuwa wananchi wanapata hasara..........

zitokanazo na mgao wa umeme unaotokea bila wao kutaarifiwa na kusababisha madhara makubwa kwenye vyombo na mali zao hivyo watumie radio kuwafahamisha wateja kinachotokea.

Hata hivyo amesema mgao huo unatokana na uchakavu wa mitambo ya kufua umeme  ambapo  baada ya ukaguzi  wataalamu wa wizara yake watafanya jitihada kuhakikisha mgao unasitishwa ndani ya siku 45 katika mikoa ya kanda ya ziwa.

Wakati huo huo kule Ngara, serikali imeahidi kumaliza tatizo la mgao wa umeme ndani ya siku 45 kwa  wakazi wa mji wa Ngara na maeneo jirani mkoani kagera baada ya kukamilisha ukarabati wa mashine ya kufua umeme yenye uwezo wa kuzalisha megawati 400 mjini humo.

Naibu waziri wa nishati na madini Bw Charles Mwijage amesema hayo hii leo baada ya kufanya ziara ya siku moja kukagua mitambo ya kufua umeme katika eneo la Nakatunga na Djululigwa wilayani humo.

Bw Mwijage amesema kuwa Wilaya ya Ngara ina mahitaji ya megawati 1200 za kutosheleza wananchi kupitia Tanesco lakini kutokana na uchakavu wa mitambo kunakuwepo mgao ambao unachangia wananchi kushindwa kuzalisha kiuchumi.

Hata hivyo amesema serikali inafanya mchakato wa kuhakikisha wananchi wanatumia umeme wa gridi ya Taifa ikiwa ni pamoja na ule utakaozalishwa katika maporomoko ya Rusumo na kusambazwa katika nchi za Rwanda na Burundi.

 

Na Mwanaharakati.